විදේශ කටයුතු, විදේශ රැකියා සහ සංචාරක අමාත්යාංශයේ සංවිධානයෙන්, උතුරු පළාතේ සංචාරක ක්ෂේත්රය ප්රවර්ධනය කිරීම පිළිබඳ විශේෂ සාකච්ඡාවක් අද බ්රහස්පතින්දා (2026.07.02) පෙරවරුවේ සූම් (Zoom) තාක්ෂණය ඔස්සේ පැවැත්විණි.
පසුගිය ජූනි 24 වැනිදා ගරු අමාත්ය විජිත හේරත් මහතාගේ ප්රධානත්වයෙන් කොළඹදී පැවැති සංචාරක සංවර්ධන සැලසුම් රැස්වීමේ අඛණ්ඩ පියවරක් ලෙස, 2026 සහ 2027 වර්ෂ සඳහා වන නව ව්යාපෘති ක්රියාත්මක කිරීම පිළිබඳව සොයා බැලීමේ අරමුණින් මෙම රැස්වීම සංවිධානය කර තිබුණි.
මෙම සාකච්ඡාවේදී උතුරු පළාතේ එක් එක් දිස්ත්රික්ක සඳහා වන සංචාරක ක්ෂේත්රයට අදාළ 2027 වසරේ ව්යාපෘති යෝජනා පිළිබඳව දීර්ඝව සාකච්ඡා කෙරිණි. එසේම, පළාතේ දිස්ත්රික්ක තුනක මෙම වසරේ ක්රියාත්මක කිරීමට නියමිත සංචාරක ව්යාපෘතිවල ප්රගතිය පිළිබඳවද සමාලෝචනයක් සිදු කරන ලදී. මෙහිදී උතුරු පළාත් සංචාරක සංවර්ධන කාර්යාංශය විසින් සකස් කරන ලද ව්යාපෘති යෝජනා, විශේෂයෙන්ම සංචාරක කාර්යාංශය හරහා සෘජුවම ක්රියාත්මක කිරීමට නියමිත විශේෂ ව්යාපෘති යෝජනා පහක් පිළිබඳවද අවධානය යොමු විය.
මෙම සාකච්ඡාවේදී අදහස් දැක්වූ ආණ්ඩුකාර ලේකම් සිවපාදසුන්දරම් සත්යසීලන් මහතා පෙන්වා දුන්නේ, උතුරු පළාතේ සංචාරක ක්ෂේත්රය නංවාලීම සඳහා වන මෙම ව්යාපෘති ක්රියාත්මක කිරීම සම්බන්ධයෙන් උතුරු පළාත් ගරු ආණ්ඩුකාර නා. වේදනායගම් මහතා දැඩි අවධානයකින් යුතුව කටයුතු කරන බවයි.
මේ අතර, අමාත්යාංශය වෙනුවෙන් මෙම සාකච්ඡාවට එක්වූ සැලසුම් අධ්යක්ෂ ජනරාල් එච්.පී. සෝමතිලක මහතා අවධාරණය කළේ, රුපියල් මිලියන 50කට වැඩි ප්රතිපාදන සහිත ව්යාපෘතිවල ව්යාපෘති සැලසුම් අනිවාර්යයෙන්ම ජාතික සැලසුම් දෙපාර්තමේන්තුවේ ප්රමිතීන්ට අනුකූල විය යුතු බවයි. තවද, යෝජනා කරනු ලබන සියලුම සංචාරක ව්යාපෘති විෂය භාර සංචාරක අනුකමිටුවේ සහ දිස්ත්රික් සම්බන්ධීකරණ කමිටුවේ නිසි අනුමැතිය ලබා තිබීම අනිවාර්ය බවද ඔහු මෙහිදී සඳහන් කළේය.
