උතුරු පළාතේ සංචාරක සම්පත් ජාත්යන්තර මට්ටමින් හඳුන්වා දීමත්, කලාපීය සංචාරක කර්මාන්තය සහ දේශීය ආර්ථිකය තවදුරටත් ශක්තිමත් කිරීමත් අරමුණු කර ගනිමින්, ලෝක සංචාරක දින සැමරුම සැප්තැම්බර් 25, 26 සහ 27 යන දින තුන පුරා මන්නාරම කීරි වෙරළ තීරයේදී අති උත්කර්ෂවත් අයුරින් පැවැත්වීමට නියමිත බව උතුරු පළාත් සංචාරක කාර්යාංශයේ සභාපති ආචාර්ය ජේ. විවේකානන්දන් මහතා ප්රකාශ කළේය.
උතුරු පළාත් සංචාරක කාර්යාංශයේ සංවිධානයෙන් පැවැත්වෙන මෙම තෙදින උත්සවය, උතුරු පළාතේ ස්වාභාවික සම්පත්, උරුමයන්, කලා සහ සංස්කෘතික විශේෂත්වයන් දේශීය හා ජාත්යන්තර සංචාරකයින් වෙත හඳුන්වා දීම අරමුණු කර ගනිමින් සංවිධානය කර ඇති බව ඔහු පැවසීය.
මෙහිදී උතුරු පළාතේ සාම්ප්රදායික කලා සහ සංස්කෘතික අංගයන්, මහජනතාව, තරුණයින් සහ සංචාරකයින් සහභාගී වන විවිධ වෙරළ ක්රීඩා, මන්නාරම දිස්ත්රික්කයේ සාම්ප්රදායික ආහාර වර්ග සහ මුහුදු ආහාර, දේශීය හස්ත කර්මාන්ත නිෂ්පාදන ඇතුළත් ප්රදර්ශන සහ අලෙවි වැඩසටහන් ද පැවැත්වීමට නියමිත බවද ඔහු සඳහන් කළේය.
තවද, මන්නාරම කලාපයේ නිම කර ඇති නව සංචාරක යටිතල පහසුකම් සංවර්ධන ව්යාපෘති හඳුන්වා දීමත් සමඟ, දේශීය ව්යවසායකයින් සහ සංචාරක ක්ෂේත්රයට සම්බන්ධ පාර්ශ්වයන් සඳහා නව අවස්ථා නිර්මාණය කිරීමේ ක්රියාමාර්ග ද ක්රියාත්මක කිරීමට නියමිත බව ඔහු පෙන්වා දුන්නේය.
මෙවර ලෝක සංචාරක දින සැමරුම මන්නාරම දිස්ත්රික් ලේකම් කාර්යාලය, මන්නාරම දිස්ත්රික්කයේ සියලුම ප්රාදේශීය ලේකම් කාර්යාල, මන්නාරම ප්රදේශයේ සියලුම පළාත් පාලන ආයතන සහ සංචාරක ක්ෂේත්රයට සම්බන්ධ අනෙකුත් පාර්ශ්වකරුවන්ගේ පූර්ණ සහයෝගය ඇතිව පැවැත්වීමට නියමිත බවද උතුරු පළාත් සංචාරක කාර්යාංශයේ සභාපති ආචාර්ය ජේ. විවේකානන්දන් මහතා වැඩිදුරටත් ප්රකාශ කළේය.
